Йæ цард радта адæмæн

Нæ хæхбæсты куы сæмбæлай ас-зæронд адæймагыл æмæ йæ куы бафæрсай, чи у Къоста, зæгъгæ, уæд дын йæ хабæрттæ ракæндзæн, стæй ма дын радзурдзæн йæ æмдзæвгæтæй дæр. Æнæмæнгæй дæ бауырнын кæндзæн, «Сидзæргæс» æмæ «Хъуыбады» кæй цардысты нæ хæххон хъæуы. Цæгат Кавказы кæцыфæнды адæмы хæттытæ дæр сæхимæ исынц Къостайы, уарзынц æй сæ уды бæрц. Æз мæхæдæг хæрз сабийæ хъуыстон нæ буц хистæртæм æмæ-иу алы цины æмæ зианы хъуыддаджы дæр кæддæриддæр ссардтой Къостайы рухс ном.
Бутаты Хъазыбег (уæды обкомы секретарь), Нигер, Епхиты Тæтæри, Мамсыраты Дæбе арæх цыдысты Къостайыхъæуы скъоламæ, уæд уыди авдазон, æмæ-иу бабæрæг кодтой Бекаты авд æфсымæры хæдзар. Бека та уыди, Къостайы чи схъомыл кодта, уыцы Чендзейы æфсин, Гогкойы мад. Гогко та уыд Чендзейы мой. Бирæ ахуыргонд адæймæгтæ раст нæ фыссынц, ома, дам, Къостайы Дзапарты Чендзе райста йæхимæ æхсæзаздзыдæй, уый раст нæу. Къоста уыдис фыццаг цот, фыццаг сывæллон. Къоста куы райгуырд кæвдæсы, уæд йæ мад Маро – Мария амард æртыккаг бон æмæ фæдзæхста, цы нæ вæййы… уæд-иу æй мæ ингæны фарсмæ бавæрут. Къостайы фыдæл мах фыдæл Дзапарæн уыд йæ хæрз æфсымæр. Уымæ гæсгæ Бека – Бырнацон райста сывæллоны æмæ йæ бабар кодта ног сывæллонджын Туайон Чендзейæн, йæ чындзæн. Къостайы Гогко æмæ Чендзе схъомыл кодтой. Къоста йæ æмдзæвгæ «Чи дæ?»-йы фыста: 

Мæн иу ус фæхаста…
Сывæллон ахуыр.
Йæ дзидзи нæ ласта
Мæ дзыхæй, мæгуыр…

Ау, æхсæзаздзыд сывæллон ма дзидзи фæдæйы? Уæдæмæ Дзапарты Чендзе уыд йæ дыккаг мад!
 Къостайы хорз чи хъуыды кодта, уый, Дзапарты Ладо, фæцард 99 азы, дзырдта, ома, дам, уæлладжырон чызг Хъайтмазон уыд фыдус, «йæ рард дæр ысхуыстæй, йæ рæвдыд дæр – над». Куыд нæ, зæгъы, уыд Къоста тæригъæд, фыдæй сидзæр, дам-иу сидзæр вæййы, мадæй – сæдæ. 
Къостайыл цыдаид æстдæс азы, афтæ иу ахæмы ссыдис Нармæ, йæ райгуырæн хъæумæ. Уыдис хуыцаубон, адæм æрæмбырд сты чындзхастмæ. Хистæртæ гаджидау ракодтой, кувæггаг авæрдтой Къостамæ æмæ йе ‘мгæрттæм. Къостайы фæндонмæ гæсгæ нуазæн бахастой хъазты фæсивæдмæ. Радтой йын дзырды бар: «Мæ уарзон Нары комы фæсивæд, цæрут уарзонæй, хæларæй, æз та уæ чындзæхсæвты куыд æмбæлон! Мæнæ Хетæгкаты æмæ Гаджиты лæппу æмæ чызджы амонд бирæ уæд!» Радтой йын кафты рад. Ракафыд, слæууыд къахфындзтыл, цæнгтæ айтыгъта. Йæ аив кафтмæ сыстадысты хистæртæ. Цалынмæ сæ не сбадын кодта, уæдмæ йæ кафт фæурæдта. Æхсæвы баззадис Хетæгкаты Никъотæм, фæфарста Нары хистæрты йæ мад Марияйæ: йæ конд, йæ ас, йæ хуыз, аив уыд æви фыдуынд. Æхсæв фæбадт, фæарæзта нывтæ – сæры, русты æмæ цæсгомы конд скодта иу авд хуызы. Райсомæй сæ равдыста хъæубæсты хистæртæм æмæ равзæрстой йæ мады аивдæр ныв. Æххæстæй йæ мады ныв скодта Стъараполы гимназы, æмæ абон дæр йæ чингуыты ис уыцы кондæй. Афтæ нын дзырдта Дзапарты Ладо, Бекайы фырты фырт.

Дзапарты Хасан, Ныхасы сæрдар