Фæзминаг бинонтæ

Зынаргъ редакцийы кусджытæ!

Уæ бон хорз æмæ уыл хъæлдзæг бонтæ кæнæд. Фыссын уæм Уæллаг Фыййагдонæй. Фыццаджыдæр уын зæгъын стыр бузныг уæ зæрдиаг лæггады тыххæй. Уæ бæрнон газет «Пульс Осетии» кæсын зæрдиагæй. Нырмæ мæ уарзон газеттæ уыдысты «Рæстдзинад» æмæ «Сæуæхсид». Фæлæ газет «Пульс Осетии» кæсын куы райдыдтон, уæд мæ зæрдæмæ тынг фæцыд æмæ йæ кæсын æнæсцухæй, сси мæ уарзон газет, йæ райсынмæ йын æнхъæлмæ фæкæсын, куыд стыр хорздзинадмæ, афтæ. У мидисджын газет, йæ райдайæнæй йæ кæронмæ дзы бакæсæн вæййы алыхуызон цымыдисаг æрмæджытæ. Æмæ та йæ ныр дæр рафыстон. Фæнды мæ уемæ бастдзинад саразын. Курын уæ, кæд гæнæн ис, уæд-иу мын хатгай мæ фыстæджытæ уæ бæрнон газеты ныммыхуыр кæнут.

Газет «Пульс Осетии» куы райсай дæ къухтæм, уæд фыццаджыдæр дæ цæст æрæвæрдзынæ ахæм ныхæс-тыл: «Сильная Россия – сильная Осетия». Уыцы ныхæстæ адæймагæн дæттынц æхцондзинад, ныфс æмæ хъару.

Ирыстон æмæ æппæт Уæрæсе дæр тыхджын уæд уы-дзæн, æмæ нæм, дæлдæр цы бинонты, цы кæстæрты тыххæй зæгъын, ахæмтæ фылдæр куы уа, уæд. Фæнды мæ, цæмæй газеткæсæг базонгæ уа ацы фæрнджын бинонтимæ

 

Фæзминаг бинонтæ

Амондджын вæййынц уыцы ныййарджытæ, сæ кæстæртæ адæмы æхсæнмæ рæсугъдæй кæмæн рацæуынц. Адæмы æхсæн арфæты аккаг уыцы кæстæртæ сты, хистæртæ сæ цæсты кадджын кæмæн сты, æгъдау сын чи дæтты. Ирон æгъдау æмæ ´фсарм ахсджиаг бынат цы хæ-дзары ахсынц, фыдæлты фарн фыдæй фыртмæ лæвæрд цы бинонты æхсæн цæуы, уыдонæн сæ цардвæндаг æнустæм вæййы бæллиццаг.

Бирæ ис фæзминаг бинонтæ Куырттаты комы, кæцытæн сæ царды фæтк у æгъдау, æфсарм, куыстуарзондзинад, хъомыл кæнынц хорз кæстæртæ. Фæлæ мæ бæлвырддæр зæ-гъын фæнды Таучелаты Сау-
куыдзы бинонты царды уаджы тыххæй. Кæд æрыгон бинонтæ сты, уæддæр комбæсты адæмы ´хсæн ахсынц ахадгæ бынат, æмæ сæм кæд рухс фидæн йæ мидбылты худы, зæрин хур сæ йæ зæлдаг тынтæй рæвдауы, уæд æрмæст сæхи удвæллойы руаджы.

Саукуыдз хæрз æрыгонæй баззад фыдæй сидзæрæй. Йæ фыды æвиппайды мæлæт ын йæ хъæлдзæгдзинады цæхæр бамынæг кодта, фæлæ йæ къухтæ не ´руагъта, кæд фынддæсаздзыдæй хæдзары уæз йе уæхсчытыл æрæнцад, уæддæр. Коммæгæс хъæбул æнгом æрбалæууыд йæ ныййарæг мады фарсмæ æмæ хæдзар фæцудын нæ бауагъта. Никуы саккаг кодта йæхицæн йе ´мгæрттимæ йæ зæрдæйы фаг атезгъо кæнын, йæ фæллад суадзын. Хæрз æрыгон куыстуарзон лæппу йæ дыстæ арф батылдта æмæ æрлæууыд фæллойы фæндагыл. Саукуыдзы мах, ахуыргæнджытæ, нæ зæрдыл бадардтам зæрдæргъæвд, æгъдауджын скъоладзауæй. Хистæртæн æгъдаудæттаг, цины лæггадгæнаг, зианы фыдæбонгæнаг, ахæмæй йæ зонынц комбæсты адæм.

Бæргæ хорз сарæхстаид институты дæр, фæлæ йæ фадатмæ гæсгæ сфæнд кодта кусæг дæсныйад райсыныл. Æмæ астæуккаг скъолайы ахуыры азтæ фæсте куы аззадысты, уæд ахуыр кæнынмæ бацыд 5-æм профессионалон училищемæ æмæ йæ каст фæци иттæг хорз бæрæггæнæнтимæ. Уæдмæ йæ граждайнаг хæс æххæст кæныны афон дæр æрцыд, æмæ йæм фæсидтысты Советон Æфсады рæнхъытæм, ам дæр та йæхи равдыста æгъдауджын, коммæгæсæй. Йæ ныййарæг мад, дзæнæты бадинаг Зифимæ-иу арæх æрцыд æфсæддон разамындæй арфæйы писмотæ. Цыбыр дзырдæй, ныййарæг мадæн йæ бирæ исбон у арфæйаг хъæбул , æмæ ахæм мулкæй хайджын уыд Саукуыдзы ныййарæг.

Хæрзконд, хæрзуынд, куыд фæзæгъынц, саджы фисынтыл амад, æрыгон лæппуйæн æрцыд йæ амонд ссарыны рæстæг дæр. Йæ уæздандзинад, йæ аив бакаст бирæ æрыгон чызджыты зæрдæскъæфт кодта, фæлæ æмбаргæ, куыст-
уарзаг, уæззау зондыл хæст лæппу йæ цæст æрæвæрдта æмæ цардæмбалæн равзæрста йæхи хуызæн уæздан, хæдæфсарм Сырх Дыгуры цæрæг Габеты Аврам æмæ Фузæйы чызг Розæйы. Фондз хъæбулы хистæр, йæ ныййарджытæ хъæбулы ад кæмæй баззыдтой, уыцы хæрзконд, уалдзыгон дидинæгау цæхæртæ калгæ рæсугъд æрыгон чызг тынг сфидыдта Таучелаты хæдзары къулæнцой. Хызы бынмæ йæм адæймаг кæсынæй не ´фсæст. Канд йæ бакастæй рæсугъд нæу Розæ, рæсугъд у йæ удыхъæд дæр. Уый разынд, сылгоймаджы хорздзинæдтæй алцæмæй хайджын чи у, ахæм чындз. Арфæйы аккаг сты Розæйы ныййарджытæ æмæ, цы мыггаджы ´хсæн схъомыл, уыдон.

Розæ йæ уды хъарм æмæ йæ сыгъдæг зæрдæйы цæхæрæй батавта æмæ срухс кодта Таучелаты чысыл бинонты цард. Йе ´фсины бауарзта хи мадау, йæ уарзт æвдыста зæрдиаг узæлдæй. Мад æмæ чызджы уарзт кодтой кæрæ-дзийы. Æстдæс азы дæргъы се ´хсæн зул дзыхы ныхас дæр никуы рауад. Æрхъæцмæ нæ хъæцыдысты кæрæдзиуыл. Йе ´фсин цы хуыздæр хæринаг ахæра æмæ рæсугъддæр дарæс адара, куыд хуыздæр баулæфа, ууыл архайдта
æдзухæй Розæ. Фыццаг бонæй абоны онг нæ фæллайы Таучелаты мыггагæн лæггад кæнынæй.

Саукуыдзыл æрцыд кувæджы куывд. Розæ Таучелаты мыггагæн балæвар кодта æртæ фыры хъулы хуызæн лæппуйы.

Бæллиццаг уый у, æмæ æртæ лæппуйы дæр рауадыс-ты æгъдауæй, æфсармæй сæ ныййарджытау. Кæд нырма ахуыры фæндагыл лæуд сты, уæддæр бæрæг у, царды рухс бæрзæндтæм кæй схиздзысты, уый. Райгуырæн бæстæйæ сæрыстырдзинад, раттæг адæм æмæ мадæлон æвзагыл – иузæрдион, тырнын-дзинад ахуырмæ, куыстуар-
зондзинад, хистæрæн кад кæнын сты Таучелаты Саукуыдз æмæ Розæйы æртæ фырты царды уаджы ахсджиагдæр миниуджытæ.

Хистæр Чермен ахуыр кæны медицинон акæдемийы, фæндзæм курсы. Хæрзаив
– йæ бакаст, уæздан – йæ сныхас, рæсугъд – йæ рацыд. Йæ аууонæй дæр æфсæрмы чи кæны, æдзухæй хъавгæ чи цæуы, ахæмæй зонынц Чермены йæ бирæ æмгæрттæ æмæ йæ ахуыргæнджытæ. Астæуккаг Таймуразæн гыццылæй фæстæмæ йæ зæрдæ æхсайдта ФÆС-йы (ФСБ) хайадмæ æмæ, Фыййагдоны скъола каст куы фæци, уæд ахуыр кæнынмæ бацыд Галицыны арæнхъахъхъæнæн институтмæ (Галицынский пограничный институт). Уый дæр у фæндзæм курсы студент. Арæх йæ ныййарджытæ райсынц институты разамындæй арфæйы писмотæ.

Бинонты кæстæр, хæдзары фидыц, сыхбæсты тагъды цума, йæ фыдау хæрзконд, хæрзуынд, уæздан Ацæмæз нырма скъоладзау у, ахуыр
кæны дæсæм къласы. Зæрдæргъæвд Ацæмæз у скъолайы царды, алыхуызон равдыстыты активондæр ахуырдзаутæй иу. Комбæсты, цины уа, зианы уа, кæддæриддæр æрбалæууы хистæрты фарсмæ æмæ бакæны йе
´ххуысы хай. Бæрæг у, Ацæмæз йе ´фсымæртæй дæлдæр кæй не ´рлæудзæн, царды раст фæндагыл кæй ацæу-дзæн æмæ Ирыстонæн аккаг хъæбул кæй уыдзæн, уый.

Ахæм рæсугъд кæстæртæ сты нæ фидæны цард аразджытæ, нæ ныфс, нæ фидыц, нæ сомбон. Дунейы фарн ахæм арфæ ракæнæд, æмæ Ирыстонæн кад æмæ рад кæнæг фæсивæд фылдæр куыд уа.

Саукуыдз æмæ Розæ, сымах стут амондджын ныййарджытæ, æмæ уын мæ зæрдæ зæгъы, æнæнизæй, зæрдæрайгæйæ æмзай-æмзæронд куыд бауат, Дунесфæлдисæг уын цы æртæ хæзнайы балæвар кодта, уыдоны хуртæй æфсæст ут! Мады-Майрæм уын сæ йæ фæлмæн къухтæй рæвдауæд! Стыр Хуыцау æмæ йе сконд зæдты фæ-дзæхст ут!

 

Фæрниаты Рая,
Уæллаг Фыййагдоны
скъолайы ахуыргæнæг,
фæллойы ветеран