Бæрæгбон

Курдиатджын хореограф, Уæрæсейы театралон аивады университеты (ГИТИС-ы) студент Кокайты Аланы  фыццаг концерты тыххæй.

Уалдзæджы фыццаг бон, 1 мартъи, мæнæн уыд мæ царды рухсдæр бонтæй иу. Нæ зын рæстæджы уыдон бирæ не сты, фæлæ уæддæр, Хуыцауæн табу! Уыцы бон Ирыстоны хуыздæр кæстæртæй иу, Кокайты Алан, Ирон театры йæ фыд Таймуразы кадæн лæвæрдта йæ фыццаг концерт. Хонгæ дæр æй афтæ ракодта «Посвящение мастеру».

Концерт – уый хуымæтæг дзырд у. Фæлæ уый уыд кафты аивады æцæг, рухсхæссæг бæрæгбон. Мæнæ ныртæккæ не «стъалытæ» цы концерттæ дæттынц бонцухæй, бирæ æхца рассивыны æнхъæлæй цытæ ацаразынц, уыимæ йын иумæйагæй ницы уыд.

Уыцы изæр залы бадтæн,  æмæ мæ зæрдæ йемыдзаг уыд  æхсызгон æнкъарæнтæй, хуымæтæг  дзырдтæй радзурæн кæмæн нæй, ахæм равгæй. Мæнæ ма, зæгъын, кæдæй-уæдæй Ирыстоны  цæхæрцæст кæстæртæй иу (Хуыцау
сæ фылдæр кæнæд!) йæ адæмы  æцæг аивады рухсæй фæхайджын кодта!

 

Фарон (декабры) Дзæуджыхъæумæ ссыдысты Игорь Моисеевы номыл академион ансамблы артисттæ. Уыдон дæр сæ курдиат Ирон театры æвдыстой. Федтон сæ, ныхас кодтон ансамблы аивадон разамонæг, Уæрæсейы Федерацийы адæмон артисткæ Елена Щербаковаимæ. Тынг хорз рауад сæ концерт, буцæй сыл сæмбæлдысты нæ дзыллæ. Ныр Кокайты Аланы концерт дæр афтæ ахъаззаг уыд. Ацы дыууæ цауы нæ культурæйы азфысты кадджын бынат ссар-дзысты. Рохгæнæн сын нæй. Иннæмæй та, Алан  кафт куыд æнкъары, уый бынтон диссаг у. Йæ алы уæнг дæр æххæст у йæ табуйаг хъомысæй. Алан аивады йæхи равдисыныл нæ архайы, фæлæ уый фæрцы йæ уды арфæй фæлдисы алæмæты диссæгтæ. Йæ бон у ныккæсын зæрдæйы рæбинаг æвæрæнтæм æмæ сæ ныррухс кæнын йæ арæхстдзинадæй æмæ æгæрон курдиатæй. Ахæм тыхы фæрцы нын нæ удтæ бакæны йæ уацары.

Кафты йæ алы фезмæлд у, зæгъæн куыд нæй, афтæ зæрдæисгæ, аив æмæ бæлвырд. Алан æмæ йе′ мкурсонты арæхстдзинадмæ кæсгæйæ, мæхинымæр загътон: «Тæхуды æмæ Аланы хуызæн кафын куы зонин, уæд фырцинæй уæлæрвты тæхин».

Концерты кæрон Аланы æмбæлттæй иу, мæскуыйаг лæппу, ГИТИС-ы студент Павел Глухов загъта:

– Алан нын у фæзминаг хæлар. Кафты аивады хиуыл куыд кусын хъæуы, уымæй нын у дæнцæг. Суткæйы ис 24 сахаты, уыдоны дæргъы йæ æнцад бадгæ нæ фендзынæ. Æдзухдæр агуры ног гæнæнтæ йæ арæхстдзинад фидар кæныны тыххæй. Тæхудиаджы кæстæр у Ирыстонæн.

Ахæм ныхæстæ дзы зæгъдзысты ГИТИС-ы йæ ахуыргæнджытæ дæр. Аланы концертæй рацыдтæн цæргæсау базырджынæй æмæ сæрыстырæй. Уыцы æнкъарæнтæ афтæ тыхджын уыдысты, æмæ мыл суанг æхсæвы дыууæ сахатмæ хуыссæг не ′рхæцыд.

 

Кафты бардуаг бацыди дæ хуызы,

Дæ курдиатæн йæ уаз  тыхтæ – нæртон.

Сыгъдæгæй хæсс ирон лæппуйы ном,

Сæ авдæны дæ музæтæ фæузæнт.

 

Фыды фарн, ирон æгъдау, æфсарм

Ды кафты мидæг равдисын фæразыс.

Дæ уды цæхæр æвдадзы хосау уарыс,

Тæхуды, ныр дæу аккаг дзырдтæ ссар.

 

Дæ хуызæн фырттæй Иры зæхх – рæвдыд,

Кадджынæй дæ лæджы кармæ бахиз.

Куыд дын кæнæм, пехуымпарау, мах цыт,

Цæр нын, Алан, æмæ нын у уæлахиз!

 

Алцыдæр бæлвырд, карст, барст æмæ æрдынбосау æлвæст. Раст ахæм хатдзæг скæнæн ис Кокайты Аланы фыццаг концерты тыххæй. Йæ фыццаг акт куы фæци, уæд аныхас кодтон зындгонд режиссер, Уæрæсейы аивæдты
сгуыхт архайæг Сæлбиты Акимимæ. Куыд загъта, афтæмæй ахæм концерт фæстаг рæстæджыты Ирыстоны нæ уыд. Акимы фæнды  ансамбль «Чысыл джигит»-ы, стæй Аланæн йæхи тыххæй киноныв сисын. Аким, дæ фæндтæ дæ къухы бафтæнт. Уымæн æмæ Кокайты Таймураз æмæ йæ фырт Алан уый аккаг сты!

Мæ зæрдыл æрлæууыд  номдзыд ирон поэт Плиты Грисы мысинёгтæй иу. Цæвиттон, Советон Цæдисы адæмон артист Тæбæхсæуты  Балойы Мæскуыйы, Чысыл театры Отеллойы ролы номдзыд артист Хорава куы федта, уæд цингæнгæйæ загъта: «Ды, Бало, адæймаг нæ дæ, ды Хуыцау дæ». Кафты аивады ацы ныхæстæ комкоммæ зæгъæн ис Аланы тыххæй дæр.

Сахатæй фылдæр цы концерт цыд, уым аивадуарзджытæ кафты руаджы федтой нæртон дуне (кафт «Уацамонгæ»), нæ алыварс цæрæг адæмты культурæ, стæй суанг дунейы хореографийы хæзнатæ. Алан хорз сарæхст ивгъуыд æмæ фидæн, царды цин æмæ маст  æмæ сагъæсы æнкъарæнтæ кафты руаджы равдисынмæ. Иу аив цæг сæ саразынмæ. Уый у стыр курдиаты æмæ куыстуарзондзинады  фæстиуæг.

Бантысæд дын, Алан, фылдæр. Дæ фæндæгтæ даргъ æмæ уæрæх уæнт, афтæмæй Ирыстонæн сомыгæнæн басгуых!

                                        

Гасанты Валери