Цардæй ист хъуыдытæ

– Чындз! – дзуры æфсин. – Æз зианмæ цæуын, æмæ иу хæдзармæ дæ цæст фæдар. Кæрт ныммæрздзынæ, къустæ ныхс-дзынæ, карчы цъиутæн хæринаг ратдзынæ, хуртуанмæ дæр дæ цæст фæдар.

Йе ‘рцыдмæ чындз йæ къух доны дæр нæ атылдта. Цъиуты цæргæс фæхаста, хуртуан кæрчытæ бахордтой. Зæронд ус йæ уæрджытæ фæхоста, мæ хæдзар мын бабын кодтай, зæгъгæ.

– Мæн аххос нæ уыдис, –  йæхи рæстытæ кæны чындз. – Уый бæрц ныстуантæ мын бафæдзæхстай, æмæ дзы мæ зæрдыл ницыуал бадартон. Кæд дын, бабуля, мæ сæр компьютер нæу.

***

– Нæ лæг! Æрра сдæ, æви дæ сæры зонд фæцыдис? Мидæггаг хæлафы дуармæ цæмæн бадыс? Чындз дæ афтæмæй куы ‘рбаййафа, уæд ма дæ цæсгом цы фæкæндзынæ?

– Æмæ йæхæдæг алы бон йæ бикъ гомæй куы хæссы, модæ у, зæгъгæ. Уæд  дæм мæ дарæс диссаг цæмæн фæкастис? Уый дæр, не ‘фсин, модæ у, модæ!

***

– Æз царды æппæт хæрзты аргъ дæн. Æмæ нæ цард куы баиу кæнæм, уæд дæ уый курæг уыдзынæн, æмæ мын иу дæ мад æмæ дæ фыды ма фенын кæн.

– Æз уæларвон зæдтæм скувдзынæн, Мадымайрæмыл мæхи бафæдзæхсдзынæн, цæмæй дæ хуызæн æнаккаг, цъаммар æмæ налат чызг мæ уаты  къæсæрæй ма ‘рбакъахдзæф кæна. Мæ ныййарджыты та дæуыл нæ, фæлæ дунейы хæрзтыл дæр нæ баивдзынæн, – дзуапп радта лæппу.

***

– Куы дæм смой кæнон, уæд дæ фыццаг лæвар цы уыдзæнис?

– Мæ мад, мæ фыд æмæ дын мæ хойы зæрдæтæй фæрдгуытæ сараздзынæн. Дæ хъуырыл дын сæ бафтаудзынæн, æмæ сæм-иу зæрдæрайгæйæ кæс.

– Кæд дæ ныййарджытæ, дæ хо дæ зæрдæйы афтæ уæлæнгай æвæрд сты, уæд ды цæрыны аккаг нæ дæ, Нанайы хъæбул! Æмæ дæ амонд мæрдты бæсты агур, – загъта чызг.

                                                                                 

ÆЛБЕГАТЫ Керым,

Ставд-Дуртæ